يوميــات فضفضه

صباح الخير بومحمد , هلا والله بولافي حمدلله على السلامه تو مانور المكتب والوزاره ,شلونك وشلون الاجازه انشالله

حلوه , والله يابومحمد غيرنا جو واستانسنا والحمدلله انت شلونك وشلون الشغل معاك بشرني انشالله ماكوا طلعات ولا

فراره؟؟ والله يابولافي انت عارف الدوام ماعندنا اي شغله بس موظفين على الفاضي تخرجنا وتوظفنا ومانسوي شي

دام الشركات اهي ماسكه شغل الوزارات واحنا بس مراقبين مادري ليش درسنا وتخرجنا بس نطلع مع علاء وضياء

وكومار نشوفهم يشتغلون وماندري شالسالفه حتى دورات ما يعطونا انتعلم الشغل بكرا اذا راحت الشركات منو الي

يشتغل بالوزارات صارت وظيفتنا نقعد على المكاتب ونطلع مع الشركه اذا عندهم صيانه واخر الشهر نستلم المعاش

ويقولون شباب الكويت مايبون يشتغلون الله يستر يابولافي بكرا لا يطردونا ويخلون بدالنا عماله من الخارج على

اساس ارخص ويقدرون يزفونهم وما يقولون شي , والله يابو محمد قلب متروس فضفض وقولي على شان انا

افضفضلك الحال من بعضه , افا يابولافي توك واصل من السفر وشايل هم لا يكون مشاكل السفر والطيران ؟؟ والله

يابو محمد ياليت بس المطار والطيران وغيره , شنو بعد في غيرهم انت كنت باجازه لازم ماتفكر باشياء ثانيه ,

يابومحمد شقولك وشخلي اهوا المطار لين توقف تنزل اقراضك وتحطهم على العربانه ويدزهم العامل ويوصلهم لك

للتفتيش حتى مافيهم مية متر وعطيته ربع والا نص خزك بعينه تقول يبي يتهاوش معاك وانت تشتغل عنده وقالك بابا

شنو هزا عطني دينار, على شان ماتبي مشاكل واطولها تعطيهم وبعد ما اطلعهم من جهاز التفتيش ياخذهم هندي ثاني

ويوصلهم لكاونتر شركة الطيران الا قالك بابا نص دينار يتشرط عليك بعد واذا عطيته ربع قالك شنو هزا تعال نروح

عند الشرطي , اي يابو محمد اضحك , شسوي يابولافي صراحه سالفه تضحك , اي يابومحمد تضحك الحين بس وقت

السفر تغثك وتعكر مزاجك لاهي سالفة فلوس ولاهم يحزنون بس سالفة الطريقه والاسلوب يبي ياخذ منك شي غصب ,

والي قهرني اكثر وخلاني اعصب شركة الطيران

,,,

ليش يابولافي شفيها؟ يقولك اول ماتاخذ التذاكر يابومحمد لازم تكون بالمطار قبل الاقلاع بساعتين ولين توصل المطار

تلقى كاونتر الشركه مافيها ولا واحد وتنطرلك نص ساعه وساعه على مايفتحون يعكرون مزاجك وانت رايح تستانس

وتغير جو , وفوق هذا لين تبي تسافر وخلصت من الهندي ومن الشركه وتبي تطلع من بوابة الخروج للمسافرين

تمسك دور طويل بس على شان الشرطي الي عند الباب دخول المسافرين على شان تختم جوازك بس يشوفه هل هذا

انت صاحب الجواز والا غيرك يبيلك نص ساعه , زين يابولافي ليش ما يخلون شخصين يدققون على الجوازات والا

اكثر ؟؟ تكلمني انا يابو محمد؟؟ آمنا بالله وقلنا يالله هانت ختمت الجواز ورايح البوابه على شان اركب الطياره واي

طيران يابومحمد طيران الكويتيه ,,ليش تضحك يابومحمد؟؟ لايابولافي كمل لاني عارف شنو راح يصير , شنو راح

يصير يابومحمد؟؟ راح تقولي والله قعدنا بالطياره فوق النص ساعه واخر شي الطياره طارت متاخره اكثر من نص

ساعه صح يابولافي؟ اي والله يابومحمد كلامك صح, بس ابي اعرف ليش هالتاخيرشنو الي صاير بطيران الكويتيه

كانت من احسن الطيران بالعالم بس توبه احجز على طيران الكويت احجز اي طيران ثاني , يالله يابولافي المهم

وصلت بالسلامه واستانست وغيرت جو انتم السابقون ونحن اللاحقون , والله يابومحمد اهوا غيرت جو غيرت بس

لين اقراء جرايد الكويت وتسمع الاخبار تنغث بالي قاعد يصير والي قاعد يقولونه وياليت الي يقولونه يسوونه الشي

الزين يخلونه والشين على طول يسونه ليش مو عارف ؟؟

السلام عليكم بولافي شلونك , اهلين علاء تمام بخير , شو انت مداوم والا اجازه , لا اليوم اول يوم دوام ليش ؟ والله

يابولافي عدنا صيانه وبدنياك تطلع معنا , ماشاء الله توني داومت على طول يالله بعد شسوي امري لله بس خل اخذ

سياره واجيكم الموقع , بومحمد تمشي معاي نكمل سوالفنا بالدرب واتسلى معاك بالموقع ماعندنا بس انطالع ؟؟ يالله يابولافي توكلنا على الله ......

رساله الى الغاليه

وصلني مسج من صديقه عزيزه وغاليه على قلبي وكان مضمومنها اساله جميله ولكن اجمل واحلى سؤال ماهو اجمل موقف تتذكره معي؟؟
فتذكرتها وتذكرة اجمل مواقف واجمل رسائل بيني وبينها وكانت تسميني المخبر الخاص وكنت اقولها انا "جيمس بوند" لان جميع الاصدقاء كانوا ينادوني بهذا الاسم بالكليه ايام الدراسه بسبب عشقي لسيارات البي ام الالمانيه ,وفي يوم من الايام كانت هذه الصديقه الجميله وكانت من اصحاب القلوب الصافيه والحنونه من القلوب الذهب وكانت صاحبت جمال خارجي وداخلي فتان يجذب جميع من يراها,كان من يعرفها يحس بانه قد وجد كنز لا يفرط به مهما كان الثمن,فعندما ارسلت لي هذا السؤال تذكرت هذا اليوم يوم اختباراتها وكانت محتاجه للمساعده وكانت معرفتنا لم تكن طفيفه ولم تكن عميقه ولكنها استولت علي بطيبتها واحساسه الرائع وحنية قلبها,فارسلت لي رساله"مسج" لا اذكرها نصا ولكن كان المضمون "عبدالله فاضي يوم الاحد ابي منك مساعده" كان اخر اختبار لي يوم السبت فارسلت لها"امريني ماعندي شغل " فارسلت لي "عندي اختبار الساعه9 ومادرست عدل وابيك تغششني"
ابتسمت وارسلت لها"حاضر بس شلون راح اغششج؟؟"
فكانت طريقة الغش انها تعطيني مذكرتها للماده ويكون بيني وبينها اتصال عبر التليفون اول ماتستلم ورقة الاختبار وتقرأ الاختبار لكي تسمعني ماهي الاسئله وانا اجاوبها من المذكره التي بحوزتي وانا كنت في مواقف الجامعه وكان صيف حار ولكن كنت اضحك وانا اجاوبها الاسئله وهي كانت متخوفه ليس من ان الدكتور قد يمسك بها لا بالعكس كانت خائفه ان تكون اجاباتي خاطئه,وانتهت من حل الاختبار باسرع وقت ممكن وتشكرت مني ولكنها لم تعزمني على العشاء:(
كانت اجمل ذكرى معها وكانت اجمل ذكرى هي كيف تعرفت عليها قد لا تذكر ولكني اذكر,كانت صديقه ومازالت صديقه ومن اغلى واجمل واوفى الاصدقاء ومازالت تسجنني بطيبة قلبها واحساسها المرهف والجميل ,كانت اول من يذكرني بعيد ميلادي 19 وكانت هذه لحظة اعجابي باخلاق وقلب هذه الصديقه وشكرت ربي على هذه الصديقه وكانت ماتطلبه مني مجاب لها قد يكون السبب بسيط ولكنها هي الشخص الوحيد الذي ذكرني واحسسني بان العمر يتقدم ,قد تكون هديتها بسيطه جدا ولكن مضمونها كان رائع وسامي لاكبر الحدود المتصوره وكانت هديتها مسج غنائي من شركة الاتصالات,قد تكون هديه بسيطة بقيمتها ولكن كان يكفيني ان يكون في شخص يذكرني ويذكر عيد ميلادي فهذا دليل على اهميتي لديه,,,,
لا استطيع وصفها ولا اصف صفه واحده من صفاتها الجميله والرائعه التي اتمناها تكون في الناس الذين من حولي والاصدقاء قد يكون لديهم صفات جميله واكيد ان لديهم صفات جميله ولكن كنت اتمنى ان يكون لهم صفات هذه الصديقه الجميله والرائعه التي تذكرني في اجمل رسائلها وقصائدها الروعه ولم تشتكيلي باللحظات التي مرت بها كثيرا بس اشتكت من لحظتين فقط اذكرهم ,,,
متواضعه وحبيبه واجمل انثى رايتها وعرفتها على مدى عمري الذي عشته قد يكون هناك الكثير من النساء اللاتي يشبهنها ولكن يكفيني هذه الصديقه الرائعه,,,

لم اكتب عنها ولم اكتب لها ماتستحقه ولكن اتمنى انها تسامحني ولكنها تعرف مدى غلاتها في قلبي ومدى اعجابي باخلاقها واحساسها الرائع واتمنى انها لاتغيب عني ولا على هذه الدنيا واتمنى لها الحياة السعيده والابتسامه الدائمه,,,