بداية الطريق

اول شي اشكر كل من علق وسامحوني اني مارديت على التعليقات لاسباب وراح اذكر السبب الي خلاني ما ادر ولا انزل موضوع جديد بس بالاول اشكر وحده شكر خاص لانها دايم تسال عني لانها غاليه وعزيزه واخت قبل كل شي الاخت شيماء الكندري لانها ديام السؤال عني ولا قصور بالناس الثانيه بس اشكرها شكر خاااص واقولج ياشيووووم مشكوووره وانا بخير والحمدلله وسبب انقاطي هو كالتالي وراح اذكر القصه بس الله يستر من العين يا شيووووم ,,

هذا الكلام حصل قبل شهر تقريبا او اكثر كنت قاعد بالبيت والا اتصال من بنك برقان بنكي الجديد ,,,
قلت الو والا يقولي الاخ عبدالله الظفيري , قلت نعم معاك عبدالله ( طبعا قلت الله يستر البنك يتصل لا يكون صاير شي لان شهرين سفر اخاف يقولون حل القسط ) المهم رديت عليه قلت له امرني اخوي , قالي الاخ عبدالله انت فزت معانا بجائزه , ( بيني وبين نفسي اقول انشالله تكون تذكرة سفر على الاقل شي يسوى) , بشنو فزت اخوي ؟؟
اخ عبدالله لانك عميل جديد عندنا دخلت السحب وفزت معانا بمبلغ 25 الف دينار واتمنى تمرنا باي فرع عشان تستلم جائزتك ,, انا مو مصدق قلت اخاف واحد مسوي فيني مغلب , زين اخوي اسمك , قالي معاك احمد الفلاني ...
قلت له انشالله متى مافضيت امركم واشووف ,, قالي اوكي وقبل لا يسكر الخط قلتله شرايك امرك الحين مو احسن ( قلت خل اروح يمكن صج ) قالي خلاص على راحتك,,,

رحت البنك وقلت لهم داقين علي وقلتوا اني فايز بجائزه اسالتي ذيك الموظفه الحليوه مو حلوه يعني ,, اسمك اخوي قلتلها عبدالله الظفيري, قالت دقيقه بس , اخذي راحتج اختي طبعا انا افكر شنوا سوي بالفلوس اذا صج الافكار تاخذني وتوديني ,,,

قالت اي اخوي فايز معانا 25 الف مبروووك واهي تبتسم , الله يبارك فيج بس وين استلمها قالت روح عند المدير طبعا المدير كان ظفيري الحمدلله بس راح يفضحني عند الاهل لان مابي احد يعرف بس قلت المهم استلم الفلوس وبعدين خل يعلم الناس كلها ,,

السلام عليكم اخ جمال شلونك هلا والله عبدالله شلونك امرني ,,( المدير يعرفني ويعرف العايله ) والله يا جمال قالولي اني فايز وابي استلم الجائزه قالي مبروك بس خل اجهز الاوراق عشان لازم توقع قلت اوكي اوقع حتى على بياض افا عليك بس ابيهم يدخلون احسابي احسن قالي اوكي ,,,

وقعت وخلصت ومبروك وتستاهل وصارت 25 الف بحسابي , اول شي قلت عشان الله يباركلي فيهم لازم اتبرع بمبلغ طبعا اذا عندك 25 دينار تتبرع بدينار قلت اتبرع بالف عشان الله يباركلي فيهم ,, وبعدين رحت دفعت مكالماتي وعطيتا لوالده مبلغ ,,

قلت لازم استثمرهم والحمدلله ضاربت بالبورصه وربحت مبلغ صغير لاني دخلت بمبلغ صغير , واشتريت سيارات كتجاره والحمدلله ماشي الحال معاي ,,,

والحمدلله الجائزه وصلت بالوقت المحدد لان اخوي والفال لكم عرسه هالشهر فعطيته مبلغ صغير ,,,

كان هذا السبب الي شغلني عن عدم كتابت موضوع وعدم الرد على التعليقات بس ما منعني عن زيارة البلوقات لاني كنت اشبك وانا بالدوام واعلق ,, والله يرزقكم نفس ما رزقني وبالتوفيق للجميع ,,,