الله يبعده عنكم وعن الي تحبونه

اسمحولي وسامحوني على هالموضوع الي ما حبيت احطه وكان عندي اكثر من موضوع حق رمضان بس مو بيدي واتمنى دعواكم

بعد مارديت البيت يوم الاربعاء الظهر لقيت الوالده وضايق خلقها والدمعه على عينها :

أنا: شفيج حجيه عسا ماشر شصاير ؟؟

أمي: مافي اي شي بس تعبانه

أنا: اوكي

أمي: عبدالله روح جيب عيال اخوك من المدرسه لان امهم مو هني

أنا: وين رايحه ؟؟

أمي: بالمستشفى

أنا: ليش شفيها عسا ماشر؟؟

أمي تبكي : طلع فيها سرطان بالثدي

أنا مصدوم : انتي اتكلمين صج والا تضحكين

أمي : لا صج

أنا: زين اهي وينها الحين مع منو ؟؟

أمي: مع بنتها بالمستشفى تشوف الدكتور

أنا: اوكي انا بروح اصلي وبعدين اروح المستشفى اشوفها

رحت اصلي وسمحولي والدمعه ودها تطلع والدنيا سوده صارت , وصليت وانا ادعيلها , لانها اخت واكثر , وانا صغير اهي كانت تسبحني مع عيالها وتحبنا اكثر من خوانها وماترضا علينا , والحزن بالبيت بس ما اقول الا قدر الله وما شاء فعل والله يقومها بالسلامه

اسمحولي على هالموضوع بس هالشي الي خلاني ما اضيف اي موضوع

كل عااام وانتوا بخير :)

مباااارك عليكم الشهر , وصياام مقبول وذنب مغفور , واللهم يمحي كل ذنوبكم انشالله يارب

الى كل من احببته سيبدأ رمضان غدا , لكن قبل ان يبدأ صفحته سأدون اعتذار لكل من اخطأت في حقه غفر الله لنا ولكم وبلغنا رمضان وكتب لنا ولكم فيه العتق من النيران آمين يا رب العالمين

والله صارت طرطره ومصخره ..

وين وزارة الداخليه ؟؟

وين البلديه عنهم ؟؟

وين الشرطه والمباحث ؟؟

وين الدين والا نسووه او تناسووه الناس ؟؟

الصراحه وين الناس المسؤوووله عن المهزله الي قاعد تصير بالبلد ؟؟

صج صج حســـــــــــــافه وشي يحز بالخاطر ويضيق الخلق .....

ادري مستقربين ومندهشين من الصوره والاساله بس انا راح افهمكم واقولكم الي صاير...

امس بالليل طالع انا واثنين من الشباب حسبت خوان , انتمشى ونستانس وانتعشا على حساب واحد من الشباب , الشباب الاثنين اهم (ع.ن) والثاني( ن.م) والعشا على حساب (ع.ن) بمناسبة نزول المنحه , المهم بعد الفراره والغز من الشاميه لي شارع الحب لي شارع الخليج , قالوا يالله انتعشا قالنا ( ع.ن ) وين تبون قلنا نبي ( تشيليز ) او ( فرايديز ) المهم لين وصلنا ( تشيليز ) الا فاضي مافي احد مو على عادته الحبيب ( ن . م ) يبي ناس تكون بالمطعم يحب يطالع على شان تشتغل الشماته والضحك والتطنز على بناتنا الله يهديهم واشكالهم اللهم لا شماته , المهم اتفقنا على ( فرايديز ) لان امس زحمه , اول ما صفطنا ونزلنا والا البنات اطالع مو لله لان السياره كشخه , يا حبهم للمظاهر , المهم دشينا المطعم صج حلو والجو داخل يونس ويفتح النفس , اسالونا جم واحد قلنالهم ثلاث , عطانا طاوله كل الي حولينه جنس ناعم على كلامهم ناعم , المهم من اول ما قعدنا واحنا ضحك وكركره بس على الخفيف من بعض الاشكال الي موجوده

الا المنظر الي صج لازم مافي احد يسكت عنه , الا ذاك الاجنبي اوروبي مفتوحه زرارات قميصه ويطوطح مايدري وين الله قااطه واثنين من الشباب الكويتي معاه ماسكينه خايفين يطيح لان صاحبهم الاخ كااان تارس الطاسه وشااارب لين الخمر طالع من خشمه .. وين ؟؟ بالمطعم جدااام الناس والعوايل والاطفال , الصراحه من شفت الموقف اتصلت على 777 والا صاحبي ( ع . ن ) يمسكني ويقول سده ماراح يكلمونه بالعكس يكلمونك لانه اجنبي ....

بعرف شهالمصخره والانحطاط بالناس ؟؟؟

ليش صارت ديرتنا جذي ؟؟

والله حرام .. صح ان فيه ناس تشرب وتسوي بس مو في مكان عام وفيه اطفال ترى غلط بالدين وحرام وهم بالعادات والتقاليد...

بس في موقف صار صج الله يهدي بناتنا ويثبت عقووولهم ويهديهم ...

تقريبا 10 بنات قاعدين على طاوله وضحك وغشمره بس لا تشوفونهم اللهم لا شماته , الي مسويه عمليه حق خشمها والا مادري شنو لابسه والا الخاله ههههههههه , صج يضحكون , المهم الموقف في وحده منهم عيد ميلادها امس فيابولها كيكه صغيره عليها شمعه الكيكه زين تكفي شخص واحد واهم 10 , الحين يطفون الشمعه , خلصت الاخت وطفتها بعد جهد جهيد , قامت حطت الكيكه جدامها وقامت تدعي ؟؟؟

انا هني تنرفزت بس قمت اعلق عليهم بضحك , الاخت تدعي جداام الكعبه استغفر الله , يعني صج مصخره , خلصت الاخت من الدعااء

يعني تتمنى الحمدلله والشكر, الحين الداهيه الثانيه الخطيره الخاله خذت الكيكه تبي تدعي وتتمنى اهني انا بطيتها ضحك , والتعليق اشتغل اقولها ادعي ربج يخليج بيضه , لا تنسين تخلين باجي البنات يدعون فريها عليهم واذا ممكن بعد على طاولتنا ...

الصراحه تفكير البنات صفر صج ناقصين عقل ودين .. والله يهديهم

الحــب وما يفعل ؟؟

كاف لام ميم نون.... اي بي سي دي اي اف جي

ون تو فور ثري .. ثلاثه خمسه حتى اثنين

وين الزير يشوف همي .. ويشوف اهبال بس عجي

لغة الضاد انطقها.. واخربطها على نصين

مثل ليلي مع نهاري يجرني ولادري وين

والارقام امكسها .... عربي شوي مع افرنجي

حسيب الله يا(زيري) .... ولفين خانني مرتين

خلى القلب مكان الكبد...يوم ارجاه وانا ارجي

وضاع العقل وصرت مجنون... ولا ادري انا من وين

وتاليها مع قلبك؟ انا ناقص وجع وجدان!!

دخيلك فضي السيره... تعبت انزف معاناتي

تعالي ننهي الماضي ... ويكفينا نكون اخوان

ابطوي صفحة العاشق... واعيد احسب حساباتي

انا المذنب وانا المخطي وانا الآآسف وانا الغلطان

ويا ليتك يا الزمن ترجع ... واكفر عن خطيئاتي

وانا الجاني وانا المجرم وانا الغادر وانا الخوان

وانا اكبر غبي شافك حديقه في مساحاتي

صـــــغيره...!!

تــوك صغـــيره وابتــــديتي تـحبين *** مـن علمك ليل السهـر ياصغيره

بـدري عليك العشـق يابـنت هالحين *** حـرام هذا القلب وشهو مصيره

انتي بريئه في الـهوى ليـــه تشقــين *** صدمـاته لقلبك تـراها خطيره

عيشي الطفولة واتركي الحب بعدين *** وادروبه طـوال عليك وعسـيره

الشوق يفضح لاانكشف داخل العيـن *** وانتي بنفسك ماهقيتك بصيره

إن كـــان قصــدك بالمحبــة تسلــين *** بالعكس بتشـوفين هــمّ وحيره

الحـــــب قبـلك هـــز نــاس كثـــيريـن *** خلاّ القلوب تعيش خوف وغيره

طيعـي كلامـي واحــذري لاتـمادين *** تـراجعي عسى في الأمـر خـيره

عيشـي الطفـولة والـبراءة لك سنين *** وبعـديـن حـبي لاغـديتي كبـيره

مــاباليد حيــله

جتني وقالت خذ بقايا هداياك

وهاك الرسايل وأعتبرها نهايه

وخل ذكرياتي والصور دوم وياك

مابـيك تنساني وتنسى هوايه

وأستر على ماشفت مني وماجاك

وعساك تذكر ذكرياتك معايه

قلت أسمعي,قالت عسى الله يرعاك

ماعاد ينفع ياحبيبي كفايه

صاح الضمير وقال يالزين وش جاك

ودي أعرف اليوم شنهو خطايه

ودي أعرف اللي حصل لاعدمناك

شاللي حصل بالضبط شنهي الحكايه

قالت (خطبني) شخص مثلك وشرواك

وأبوي وافق وحطم منايه

قالت وهي تبكي ترى الكل يفداك

لكن ظروف الوقت زادت شقايه

غصب علي اليوم أوادعك وأجفاك

مجبوره ياقلبي أفض الروايه

لاتعتقد في يوم أنا بقدر أنساك

أنت الوحيد اللي له القلب غايه

والقلب صابه وقتها ألف دكاك

والهم أعلن في حياتي البدايه

يــوم الثــأر -2

اما الثأر الثاني فكان للازرق الفرنسي الذي رد اعتباره امام بطل العالم المنتخب الايطالي بعد هزيمه ثقيله , وكان مستوى المنتخب الفرنسي قد اذهل الجماهير , وكان افضل من رائع من تمريرات وتحركات اللاعبين وتكتيكات المدرب , واسقط الديوك نظيرهم الطليان بثلاثة اهداف مقابل هدف يتيم , ويدين الديوك بالفوز المستحق للمهاجم المبدع جوفو بعد تسجيله هدفين في الدقيقه الثانيه والدقيقه 55 واما الهدف الثالث كان من نصيب الوحش تيري هينري في الدقيقه 18 ومن وجهت نظري ان هينري قد " خيط " بمدافعي ايطاليا ولم يرحمهم , وانا الهدف الوحيد للطليان كان برأشية جيلاردينيو في الدقيقه 20 لحفظ ماء الوجه , ولكن كان هناك فرق كما الفرق بين الارض والقمر بين مبارات الازرق الكويتي ومبارات الازرق الفرنسي ولكن تشابه بلون اللبس , وهاردلك لمشجعي ومحبي الطليان....

طبعا انا من مشجعي الديوك , بس الصراحه الي شفته من جماهير الطليان لو ذابحين اهاليهم مايسوون جذي بس هم قعدت اتشمت فيهم الي اعرفه والي ما اعرفه بالشيشه بس والله كسروا خاطري , واللهم لا شماته وكل عذرهم عندنا النجمه الرابعه بس ما اقولهم غير نقعوها وشربوا مايها احسن , وهذا الفوز اهداء لزين الدين زيدان المايستروا "ابو زدنه" والله يعينكم ...

يــــوم الثـأر ...

ثأر المنتخب الكويتي من المنتخب الاسترالي بعد ما فاجأ الازرق جماهيره والجماهير الاستراليه الحاضره بمفاجأه من العيار الثقيل بفوزه بنتيجه 2\0 ,بعد تقديم مستوى رائع وخاصه في الشوط الثاني الذي شهد هدفي المبارات , الاول برأس خـلف السلامه في الدقيقه 55 بعد تمريره متقنه ورائعه من زميله جراح العتيقي , وبعد الهدف الاولارتفعت معنويات شباب الازرق وليخطفوا الهدف الثاني من لعبه جميله جدا بين بدر المطوع وفرج لهيب , ولم يتوقع حارس مرمى استراليا التسديده من بدر المطوع واندهش من الزاويه التي اختارها بدر المطوع , لانها اقرب من هدف في " بليستيشن " وكان في الدقيقه 66 وقدم اللاعبين بلا استثناء من حارس ودفاع ووسط وهجوم مستوى طيب ورائع , وكان الفوز رد اعتبار للازرق بعد خسارته في الجوله الثالثه من التصفيات بنفس النتيجه من استراليا , وبهذا الفوز يرفع الازرق رصيده الى اربع نقاط بانتظار مباراته المقبله مع الاحمر البحريني الشقيق 15 نوفمبر , ونتمنى من شباب الازرق تقديم ماعندهم للتاهل مع استراليا , ويعطيكم الف عافيه على المستوى والنتيجه ولكن شدوا حيلكم لان لياقتكم البدنيه مو شي

هــل يصالح الازرق جماهيره اليوم ؟؟

تقام اليوم مبارات مصيريه تحدد مصير الكويت بالتاهل مع المنتخب الاسترالي , ولن يفيد الكويت غير الفوز لكي يخطف بطاقة التاهل من المنتخب البحريني الشقيق, واتمنى حضور جماهير لتشجيع منتخبنا الوطني ومأزرته ورفع معنويته , والله يوفقك يالازرق

انشالله يعجبكم هالتغيير

تـــواضع شبــاب الكــويت

حبيت اذكر هالشي يمكن مو مهم للجميع بس هذا شي عاجبني و حاب امدح هالنوعيه من الشباب لانهم يستاهلون هالشي

اليوم مريت (ماكدونالدز) اتغدا فطلبت من السياره اول شي دفعت الفلوس ورحت استلم الطلب (الاوردر) فكانت جدامي سياره فلمحت حجاب الموظفه الي تسلم الاوردر, فستغربت قلت يجوز تكون (كويتيه) فلما صار دوري جدمت والا اشوف ياسبحان الله وماشاء الله ذاك القمر الي طالع بالنهار والجمال طبعا مكياج ,الا بنت حلوه متحجبه والابتسامه شحلاتها واسلوب حلو , فقلت " لو خليت لخربت " وقلت هذا دليل على تواضع اهل الكويت وشبابها مونفس مايقولون الناس الكويتيين شايفين نفسهم , والصراحه استانست صج ان هذا شي موجديد فهناك كويتيين تلقاهم بالجمعيات وستاربوكس والمحلات التجاريه بس هالسنه انتشروا بكل مكان , والله يعطيهم العافيه على جهدهم وحبهم للشغل , وانا اقولهم شدوا حيلكم والشغل مو عيب احسن من الي قاعد عله على اهله وعلى الكويت

هذا النص الاول من الموضوع الي شاغلني 1

بالاول حبيت اشكر حبيب قلبي واخوي الفنـــان المبدع عــادل القلاف على رسوماته الحلوه وعلى سماحه لي بعرض رسوماته

الموضوع الي ناطرينه اهو خيانة بعض الازواج لزوجاتهم ونفس الوقت خيانة الزوجات لازواجهن وابنائهم وعوائلهم يعني صارت ظاهره منتشره بالكويت ...

قصدي خيانة الزوج لزوجته مو يعني يتزوج عليها لان بهالوقت الي يتزوج على زوجته يعني خاينها ,مادري شلون تفكير الحريم ترضى ان زوجها يخونها من وراها بالحرام بس ماترضى يتزوج عليها بالحلال,الحرمه العاقل والي تحب عيالها وزوجها ومصلحتهم لازم ترضى بهالشي لان الله حلل للرجل الزواج من اربع,وانا اقول هالكلام مويعني راضي بهالشي بالعكس انا اعارض هالشي ,وصار موقف لي مع واحد معرفه متزوج وهذا الي صار:

المتزوج:عبدالله انا ابي اتزوج وحده ثانيه على زوجتي وقاعد ادور على بنت الحلال

أنا:ليش تبي تتزوج عليها؟مقصره معاك بشي والا مو معطيتك حقك؟

المتزوج:لا والله مو مقصره معاي ومستحملتني ومستحمله طلباتي ونفسيتي وكل ما اكشر تبتسم بوجهي واي شي اطلبه تسويه لي واي شي تطلبه مني ما اعطيها بنفس الوقت...يبتسم

أنا:شنو السبب الي يخليك تتزوج عليها دامها مريحتك ومو مقصره معاك ومسويتك"يادهينه لا تنكتين "يعني تجازيها بعد الي سوته معاك انك تتزوج عليها ؟

المتزوج:بس انا الله محللي اربع وعندي مقدره ماديه على الزواج

أنا:الله قال تزوج اربع صح بس اذا كانت مقصره معاك ومع العيال وماتلبي طلباتك وماتسمع كلامك

المتزوج يدور عذر : الصراحه احب التغيير وابي وحده احلى من زوجتي

أنا :اوكي يعني هذا سبب مقنع بالنسبه لك ؟

المتزوج: اي مقنع حده

أنا :يعني زوجتك اذا شافت واحد احلى منك بالشكل والجسم وعجبها وكان ودها تغيير راح ترضى انها تخونك؟؟

المتزوج حده معصب : طبـــــــــــعا لا شنو تروح مع واحد

أنا : بس انت توك تقول هالسبب مقنع يعني حلال عليك وحرام عليها ؟؟ صح انه حرام بس انت راح تحدها على هالشي على شان تعاندك وتغثك وتخرب عليك حياتك

المتزوج:انت مع حقوق المراه صاير ؟

أنا:لا انا مع الحق ,يعني مثال اذا انت موظف نشيط واداوم اول الناس وتطلع اخر الناس وتكرف ويجيك المدير اخر الشهرويعطي الموظف الي مايداوم ولا يعطي نفس انت ماتعطي مكان عملك ترقيه ومكافأة ماليه وانت مايعطيك شي ؟؟

المتزوج: طبعا لا ما ارضى

انا:شنو راح تصير ردت فعلك؟ وشنو راح تسوي ؟

المتزوج:اول شي راح اكره الدوام وماراح اداوم نفس قبل ويمكن عناد عليهم راح اخرب شغلهم

أنا : اوكي زوجتك راح تسوي هالشي,اهي مو مقصره معاك ولا شي ولين تتزوج عليها راح تقول انا مو مقصره معاه وراح تزوج علي يعني اذا ماكنت مقدرته شنو راح يسوي ,ويمكن تروح تخونك وهذي الزوجه طبعا الي مو خايفه الله وراح تمرمط كرامتك بالارض وشي راجعلك وانت وضميرك

المتزوج ضايق خلقه: كلامك صح وخلاص ماني متزوج كرهتني بالزواج وياليت ما قلتلك

طبعا هذا النوع من الازواج الي خايف ربه ويبي كل شي بالحلال وهذا النوع ارحم من الثاني الي يدور "الدنفسه" الحرام ومايخاف على اهله ولا زوجته ولا عياله وراح اقولكم قصه صارت جدامي مع واحد اعرفه بعد ادري راح ازعجكم بس استحملوني

قال الله تعالى"الزاني لا ينكح الا زانيه والزانيه لا تنكح الا زاني" يعني يا ازواج ويا زوجات لين تزنون باجر ماراح تتزوجون الا زانيات واذا مو زوجاتكم والا ازواجكم عيالكم خافوا عليهم حرام,ولا تنسوون حكم المحصن الزاني هو الرجم حتى الموت

ولين تقول للزوج ليش تسوي هالشي يقول بكل بساطه ابي انكح وحده ثانيه ابي التغيير,زين تبي تنكح الله معطيك بنت الحلال ونكح بالحلال والا دايم الحرام يصير حلوو؟؟

ولين تقوله اذا اهي عاجبتك بالجماع والفراش ليش ما تتزوجها ويكون بالحلال يرد ويقول اخااف صج اتزوجها يبا هذي مو شريفه, وانا معاك بهالشي بس هم انت مو شريف..

والي يبط الجبد ويقهرني ويرفع ضغطي لين يتعرف على وحده يدللها ويدلعها ويعطيها الي تبيه وزوجته كل ماتطلب منه شي لها ولليهال يقول ماعندي ونفسيته خايسه, وفووق هذا في نوعيه اعرفها لين تسافر حبيبته يروح وراها على طول ولين تقوله ام العيال عفيه خل اروح معاك يقول شلون تروحين ؟ انا رايح مع الشباب مايصيرواهوا ابو الشباب مسافر حق الحـــــب ست الحسن والجمال,

والا الحبيبه ناطرته يوصل بالسلامه الفندق وناطرته بالسويت وماجرته على حسابها بس على شان يعطيها المقسوم واهي على بالها يحبها ويموت فيها ماتدري الاخت انه يبي ياخذ شرفها ويخليها باجر ويتعرف على غيرها والي يضحك ويقهر بنفس الوقت لين يكون بالدرب راجع للديره وهذا الموقف صار جدامي , حواار صار بين الزوج والزوجه والحبيبه مكالمه هاتفيه شوفوا شنو صار:

الزوج يشوف التلفون يرن ويشوف الرقم ولايعه جبده وماله خلق الا منو المدام داقه عليه..

الزوج: الووو "طبعا بغير نفس " نعم اشتبين؟؟

الزوجه المسكينه: ها حبيبي وصلت والا بعد ؟؟

الزوج: اي توني واصل ,يعني لازم ادقين انا راجع البيت يالله بااي

الزوجه:بااي حبيبي ,انشالله توصل بالسلامه

الحين الزوج يدق على الحبيبه والابتسامه شااقه الحلج"الفم"

الزوج : ها ياقلبي وين وصلتي انا بالدرب ؟

الحبيبه : هلا يادنيتي انا هم بالدرب مع الاهل واختي تسلم عليك

الزوج: الله يسلمج ويسلمها.......

طبعا المكالمه طولت لين وصلت الحبيبه البيت وارتاحت وبعدين سد الخط, وانا ما اقول كل الازواج بعضهم لا يكلم زوجته بحنيه وحب واشتياق بس هم اسمه خانها, وفي طريقه طايحين فيها بعضهم انا اعرفها يمكن في وحده متزوجه وزوجها يسوي معاها هالشي,الطريقه ان الزوج يسافر البحرين مع الشباب ويشتري كرتونين حلوى من شويطر ويخشهم "يخبيهم"عند واحد من اصدقائه ليش ؟؟

لان في نيه انه يسافر مصر بعد اسبوع ومايبي يقول للمدام فبعد اسبوع يقول للمدام انا بروح البحرين عندي شوية شغل ,والمسكينه اوكي حبيبي بس لا تنسى الحلوى ,طبعا حريمنا ما يبون من البحرين الا الحلوى تقول مو شايفين خير لو تفتح فرع بالكويت تربح, المهم الزوج يسافر مصر ويستانس مع الحبيبه ويلعب من ورى زوجته ولين يرجع يمر على صاحبه الي خااش "مخبي "الحلوى عنده وياخذ منه كرتون ويوديه البيت طبعا المدام تصدق على طول انه كان بالبحرين وعلى نيتها,بس انا اقول للازواج ترى يمكن وانت تعاشر الحبيبه بالسفر وزوجتك بنفس الوقت تخونك مع واحد بفراشك ,ونفس ما تدين تدااان,وخاااف من الله اول شي سبحاانه الله يعرف بكل شي بس يبي يشوف هالبشر شنو راح يسوي ولا تنسى مرض الايدز الله يبعده عني وعنكم انشالله , وانا اقول للزوجه يد بهالشي والله يعينكم وانا عندي وايد حجي بس كافي لهذا الحد وانشالله يعجبكم هالموضوع الي شاغلني بس ترى في تكمله , والتكمله راح تكون عن الزوجات فانتطروني وشاكر لكم

حــزن يعم الشارع الرياضي المصري

سامحوني ماقدرت اكتب الموضوع الي شاغلني لان هالخبر جذبني وخلاني أأجل الموضوع وانشالله اضيفه اليوم

قرأت بجرايد اليوم هالخبر الي ضيق خلقي والي احزني بوفاة اللاعب المصري الوحيد الي عجبني لعبه واخلاقه ,ولين

قرات قصة وفاته تاثرت فيها وما قدرت اكتب شي من عندي لاني ما قدرت اعبر عن اي شي فنسخت هالخبر والقصه من جريده الاهرام المصريه...

سمعت الخبر‏..‏ خبر إيه؟ خبر وفاة محمد عبدالوهاب‏..‏ عبدالوهاب مين؟ لاعب الأهلي‏..‏ مش ممكن‏!!‏ مش معقول‏!!‏ أكيد انت تمزح‏..‏ دي إشاعة‏..‏ هكذا دار الحوار بين الكثيرين داخل الأهلي وخارجه في الساعات الأولي من صباح أمس‏.‏ فالكل في ذهول غير مصدق أو غير مستعد للتصديق‏..‏ فكل الجرائد تتحدث عن قرب انتهاء أزمته واستعداده للمشاركة في لقاء الصفاقسي يوم‏9‏ سبتمبر الحالي بدوري إفريقيا‏..‏ لقد كان خبر وفاة عبدالوهاب صاعقة نزلت علي الجميع‏..‏ الكل يستقبله باندهاش رهيب‏..‏ الكل في حالة توهان من واقعة الموت المفاجئ في يوم الصدمة والحزن في النادي الأهلي تحديدا في الفريق الأول لكرة القدم‏.‏الحكاية صعبة لأنها حكاية دموع وحزن وخسارة كبيرة للكرة المصرية وليس للأهلي فقط‏.‏ فهذا اللاعب لا بديل له في المنتخب علي نفس مستواه في الناحية اليسري‏,‏ وقد كانت الساعات الـ‏24‏ الأخيرة في حياة عبدالوهاب مليئة بالمؤثرات‏,‏ فهو لم ينم قبل الرابعة صباحا بعد أن قام بتصوير أغنية مهرجان اعتزال سيد عبدالحفيظ‏,‏ ثم استيقظ مبكرا وذهب إلي النادي‏,‏ وداخل غرفة خلع الملابس كان مختلفا في كلامه الغريب‏,‏ لكن أحدا لم يفهم‏,‏ فقد اقترب من أحد زملائه بالفريق وهمس في أذنه وسمع كلامه لاعب آخر بالفريق وهو يقول له‏:‏ أحمد وحيد لاعب الترسانة مات في عز شبابه‏,‏ المفروض نتعظ ونتقي الله تعالي ونمشي صح‏,‏ لأن الصغار اللي زينا ممكن يموتوا في أي لحظة‏..‏ ثم خرج من الغرفة وتحدث مع أسامة حسني وقال له‏:‏ ياأسامة من علامات الساعة الموت المفاجئ‏..‏ الشباب اللي زينا بيموتوا بدري‏.‏وذهب عبدالوهاب للمران بعد تدريبات جيمانيزيوم‏,‏ وكان يتدرب بشكل جيد وهو يقول لزملائه‏:‏ أنا أتدرب بقوة لكني أشعر بالتعب الشديد ثم خرج إلي الملعب وأدي تدريبات الإحماء حتي وصل إلي التقسيمة وحاول تسديد إحدي الكرات كعادته لكنه ترنح ومال إلي الأمام ثم استقام وسقط للخلف‏,‏ واتجه إليه كل اللاعبين وهم في خوف وذهول‏,‏ لأن السقوط كان غريبا‏,‏ وحضر الدكتور إيهاب علي وداخل سيارة وائل رياض تم نقله لمستشفي مصر الدولي بالدقي‏,‏ ويبدو أنه كان قد لفظ أنفاسه علي أرض ملعب مختار التتش بالجزيرة‏,‏ ولم تفلح أي محاولات داخل غرفة العناية المركزة‏,‏ وخلف سيارة وائل انطلق الجميع‏,‏ فقد توقف المران أو تم إلغاؤه وذهب اللاعبون إلي المستشفي وهم في حالة خوف وصدمة وذعر‏,‏ الكل يريد الاطمئنان‏,‏ الكل يسأل عن الموقف حتي خرج الخبر يقول‏:‏ إنا لله وإنا إليه راجعون توفي عبدالوهاب‏,‏ اللاعبون لم يصدقوا‏,‏ انهاروا‏..‏ توقفوا‏..‏ بكوا‏.‏ صرخوا‏..‏ رددوا‏:‏ يا الله‏..‏ لا إله إلا الله محمد رسول اله‏..‏ زهدوا في كل شيء‏..‏ توقفوا عن الكلام والحديث‏,‏ فمنهم من سقط علي الأرض‏,‏ ومنهم من تماسك جسدا ولم يقو علي فعالية دموعه‏..‏ مش معقول‏..‏ شيء لا يصدقهعقل‏..‏ كلمات غريبة تخرج من الأفواه‏..‏ معقولة عبدالوهاب الذي كان يتدرب معنا منذ لحظات الآن في رحمة الله‏..‏ في ذمة الله‏..‏ يا الله ما هذه الدنيا التي لا تستحق أي شيء‏..‏ وتم إيقاف كل شيء وسط لحظات الصدمة والحزن الرهيب حتي تحضر أسرة اللاعب من الفيوم بعد أن تم الاتصال بهم‏..‏ تعالوا‏..‏ محمد مات‏..‏ يالها من صدمة للأم‏..‏ ويالها من كارثة للخال‏..‏ فقد حضرا من الفيوم علي هيئتهما‏..‏ حتي الأحذية نسياها هناك‏..‏ وكيف يتذكران الحذاء أو كيف يهدران الوقت في ارتداء حذاء وقد وصلهما خبر وفاته‏..‏ أو وفاة ابنها فلذة الكبد ومني العين والقلب بعد أن رفض شوبير أي خروج للجثة من المستشفي قبل حضورهما‏,‏ ودخلت أمه عليه تلقي نظرة الوداع الأخير تقبله وهي تبكي بكل جوارحها ولسان حالها يقول‏:‏ ليتني أنا مكانك الآن وأنت الذي تشيعني‏..‏ خاله في حالة ذهول ولا يقول سوي‏:‏ ليه كده يامحمد‏..‏ ظل يردد هذه الكلمات حتي ذهب الابن إلي مثواه الأخير في رحمة الله‏..‏ ورحمة من هو أرحم به من أبيه وأمه‏..‏ حيث قضت أمه وخاله آخر عشر دقائق معه بالمستشفي وهو جثة هامدة‏.‏وكان مشهد الوداع مهيبا بين ما يقرب من‏40‏ ألفا ذهبوا معه حتي قبره‏,‏ بينهم كل لاعبي الأهلي بالكامل‏,‏ والجهاز الفني ونجوم الأهلي الكبار والصغار‏,‏ ومجلس الإدارة بالكامل برئاسة الكابتن حسن حمدي‏,‏ ومعه نائبه محمود الخطيب وهشام سعيد والعامري فاروق العامري وخالد مرتجي ومحمد عبدالوهاب وعدلي القيعي وكل المسئولين‏,‏ والجهاز الفني للمنتخب الوطني‏,‏ وكل لاعبي المنتخب وسيارة خاصة بهم وهم يبكون زميلهم‏,‏ وسمير زاهر رئيس اتحاد الكرة‏,‏ وأحمد شوبير نائبه‏,‏ وحازم الهواري وأيمن يونس والعديد من النجوم‏,‏ منهم عمرو زكي وجمال حمزة وعبدالواحد السيد وطارق السيد وعمرو فهيم ومحمد ثابت صاروخ وعبدالحميد بسيوني وعبدالحميد حسن وعبدالستار صبري وشقيقه عامر وإبراهيم سعيد‏,‏ وبلدته بالكامل في الفيوم‏.‏وكان المشهد رهيبا‏,‏ فهذا منهار‏..‏ وذاك يفكر في الحدث الجلل والموت المفاجئ‏,‏ وكان سيد عبدالحفيظ في حالة انهيار رهيبة لأنه كان معه حتي الثالثة من صباح الخميس حتي تم دفن الجثمان وانتهي كل شيء وأصبح اللاعب النجم المرموق في خبر كان‏,‏ وهذا هو مصير كل بشر علي وجه المعمورة‏,‏ وإنا لله وإنا إليه راجعون‏.‏

تــرقبوا الموضووع الي شااغلني

مــــوضـــــوع شـــاغلني ومعقدني ومولاقي له سبب يصير واتمنى لين تقروونه تعطوني راايكم انشالله يكوون قريبا